根據統計處去年人口數據顯示，在香港居住的獨居長者人數約為15萬，在3年間增加了3萬人之多。上了年紀便開始病痛多多，然而獨居長者的子女未必能時刻陪伴身邊，有意外狀況時都不知如何是好。所以長者安居協會於96年起提供平安鐘服務，為長者提供24小時的支援。今年36歲的蘇師傅（蘇國強），是安裝及維修服務技術員，專為長者上門安裝平安鐘。他為長者服務已有13年，在長者身上見盡所有故事，聽過不少長者的心聲。在維修與安裝的過程中，令他反思到年輕人與長者的關係，加強同理心，使他更投入自己的工作及付出更多關心給自己的父母，為長者再做多一點點。

採訪當日，記者跟隨蘇師傅由位於竹園的長者安居協會，出發到愛民邨袁婆婆的家。到達後，蘇師傅展開工作的同時，亦向婆婆噓寒問暖，並幫助做額外的搬搬抬抬工作，「有時幫婆婆伯伯換電視搖控嘅電芯、抹塵及換燈膽等，都係舉手之勞。」可見他十分有耐性，發自真心，然而，他卻說：「初初我唔係咁㗎，但呢份工真係令我反思及改變咗好多。」安裝妥當後，蘇師傅便耐心地提點袁婆婆，平安鐘的使用方法，「平安鐘有免提聽筒式雙向對話功能，平時長者只要按一下紅色掣，就接駁到去我哋嘅協會。協會嘅職員可以幫不便嘅長者預約門診、提診或社工輔導；如果有突發事故，協會可幫助報警、叫救護車、傳真電子病歷及通知家人等。」每次安裝及教學約需時45分鐘至1小時。每日走10轉
現蘇師傅在長者安居協會工作近13年，平日的工作包括上門安裝平安鐘、進行維修及檢查、教長者使用平安鐘、平安手機及隨身寶的使用方法。他表示平時每日約有8至10單安裝及維修工作，「每次嘅地點多數喺鄰近嘅屋邨，所以有足夠嘅時間跑咁多轉，最遠試過去沙頭角、長洲及大澳等地，而我主要負責沙田區及北區。今次我係去袁婆婆屋企修維及檢查平安鐘嘅運作。」00年於IVE電子科學系畢業後，蘇師傅曾於CD廠、電子底板廠及酒店收費電視公司工作，05年起，他便到長者安居協會任職技術員。他自言以往的耐性不足，又不太懂與長者溝通，但在每次安裝的過程中，他總要和屋主說話，從每次交談的過程中，慢慢掌握到當中要注意的細節，「由最基本嘅聲線，到講解內容，每次我都會因應情況作出調整。首先聲線，即使婆婆伯伯可能有少少撞聾，但唔一定大聲就得，反而咬字要清晰，用較低頻嘅音量，佢哋會容易聽到：另外，最好要拉長每個字嘅尾音及講慢啲。」在講解內容方面，蘇師傅會按長者能吸收的程度而調整，「老人家好多都有病痛，如果係認知障礙症患者，思緒比較混亂，就算我講幾多次，佢都未必吸收到，所以會簡單講一次，再教照顧者。有啲長者連手機都唔識用，咁我就會教佢打出打入及主要會用到嘅掣，除咗示範畀佢哋睇外，為咗確保佢哋識用，我會陪佢哋一齊試，要求佢哋喺我面前練習多幾次。」蘇師傅表示耐性的訓練，不是從書本中學得到，是透過與長者相處的過程中，瞭解到各獨居長者的處境，便自然而生的。想子女關心自己
在多次交談的過程中，蘇師傅慢慢發掘及瞭解每位婆婆伯伯背後的故事，「最印象深刻係我有次幫一位婆婆裝好平安鐘，佢請我飲果汁，然後大家坐喺梳化，佢捉住我雙手，問我辛唔辛苦，同埋問我平時係咪好忙，會唔會打電話返屋企，講講吓仲喊，又問點解自己嘅仔女唔打電話畀自己。言談間先知佢有3個仔女，分別係做醫生、護士及律師，但子女平時好少打電話畀自己，所以唔開心。」蘇師傅的感受很深，亦讓他學懂體諒，雖然他平時都有關心父母，但自此他更常打電話回家及回家吃飯。「喺眾多工作中，我仲見過有仔女打父母，我有衝去阻止，其實都幾痛心。見到好多老人家都好想得到家人關心，我嘅同理心會大咗，希望自己對父母都可以做多少少。有時見到長者好多病痛，好似高血壓、因痛風令到手指腳趾變形、糖尿上眼睇唔到嘢及氣促等，就會更加體諒父母生活嘅難處，因而想花多啲時間照顧佢哋。」有驚險故事
除了有讓人反思的個案外，蘇師傅表示都有驚險或環境惡劣的個案，「好污糟好多雜物嘅家居我都有去過，見到好多曱甴，又要爬入屋。另外，我有同事試過去有情緒問題嘅長者屋企，佢鎖咗我同事喺屋入面唔畀佢走，最後要報警先得。有鑑於此，遇到稍為異常嘅情況，我都會放喼喺門口或保持大門打開，方便有事逃離現場。我有次去個伯伯度安裝，由入屋起，佢就不停磨刀，我成個安裝過程都好驚，一直時刻保持警覺及望住佢，保障自己嘅安全最緊要。到我走時，佢都未磨完，好彩平安無事。」蘇師傅覺得能在工作上遇到不同的人，除豐富自己的閱歷及經驗外，能夠為長者盡一分力，亦令他很有滿足感，他希望日後能更投入工作，於安裝及維修外，再做多一點。後記：拆除與安裝
說到困難，蘇師傅表示技術上的問題並不大，難在自己的心情調節，尤其在安裝與拆除方面，「我最怕係去同一個客戶嘅屋企，拆除當初由我安裝嘅平安鐘，要拆除即係代表嗰位婆婆或伯伯已經唔喺度，嗰個見證佢哋離去嘅感覺真係幾難受。」記者聽着蘇師傅分享種種個案時，亦有點感觸，病痛與生死皆不能控制，請把握機會關心身邊的親人，回家喝個湯吧